Artea loratzen

         Beste behin ere, Durango Uriko merkatu plazak hartuko du sektorearen makro-erakusleiho hau, artisauen munduko feriarik garrantzitsuena den hau. Aurtengoan, bisitariek artisau berri asko ikusteko aukera izango dute; halaber, ezin ditugu ahaztu gure lankide izan direnak, elkartean hutsunea utzi dutenak, beraz, haiek gogoratzeko gune bat izango dugu. Abenduaren bostetik bederatzira, bisitariek 52 erakusmahaietako artisauen produkzioak izango dituzte gozagai. Gainera, erakustaldietan parte hartu ahalko dute eskuzko lanbideak barru-barrutik ezagutzeko.

         “Artea loratzen” izango da hogeita hirugarren ediziorako aukeratu den leloa; keinu bat gremioei, egiten dutena artisautza baino zerbait gehiago dela irmo eusten dioten horiei, artisautza loratzen ari direnei; izan ere, euren lana artea izaterainoko mailara eroaten dute. XXI. mendeko artisauek apustua egin dute berrikuntzaren, diseinuaren, iraunkortasunaren eta antzinako tekniken alde, eta erabiltzen dituzten materialetan berrienak bilatzeari ekiten diote. Apustu pertsonal eta profesionalei esker, euretako asko benetako aitzindari bilakatu dira. Aipagarria da aurten parte hartuko duen NUNA, Artisautzaren Sari Nazional bat eman baitiote.

         Bestalde, Euskal Dendak jadanik gure artean ez dauden kideak gogoratuko ditu. Aurtengoan, maitasunez gogoratuko dugu Zuriñe Agirre, artisau zeramikari zendu berria. Lur Keramikako alma matera, beraz, Euskal Dendan izango da, erakusketa bat jarriko da bere lanekin merkatu plazaren beheko gunean.

            Hartara, Euskal Denda topaleku saihestezina izango da artisautza bizirik dagoen sektorea dela egiaztatzeko; horren adibidea da, Durangon, lehen aldiz parte hartuko duten artisauen kopurua, % 20a. Argi geratzen da sektorean belaunaldi berria datorrela eta erakundeen aldetiko laguntza behar duela irakite bizian dabilen gremio honek.